Куславкка округӗнчи Карач ялӗнче пурӑнакан Моторкинсем ылтӑн туя паллӑ тунӑ.
Валерий Александрович ялти шкулта кочегар пулнӑ, Елена Никандровна ача пахчинче тата совхоз столовӑйӗнче поварта ӗҫленӗ. Вӗсем икӗ хӗр ҫуратса ӳстернӗ. Иккӗшӗ те педагогика ҫулне суйланӑ.
Халӗ мӑшӑр – тивӗҫлӗ канура. Ҫапах ахаль лармаҫҫӗ: пахча ҫимӗҫ лартса ӳстереҫҫӗ.
Моторкинсене саламлама вырӑнти администраци ӗҫченӗсем тата «Энӗш» фольклор ансамблӗ килнӗ.
Кӑрлачӑн 12-мӗшӗнче Куславкка округӗнчи 57 ҫулти хӗрарӑм Кивӗ Тӗрлемес станцийӗ патӗнчи лавкка умӗнче сумкине вӑхӑтлӑха хӑварнӑ. Таврӑннӑ та… вӑл ҫук. Сумкӑра вара документсем, телефон тата шӑнтнӑ катлет пулнӑ. Хӗрарӑм кун пирки тӳрех полицие пӗлтернӗ.
Аслӑ следователь Алена Аристархова сумкӑри телефон номерӗпе шӑнкӑравлама пуҫланӑ. Пӗр ҫын картишре юр тасатнӑ вӑхӑтра телефон сассине илтнӗ. Вӑл урама тухса сумкӑна тупнӑ. Ун ҫинче йытӑ шӑлӗн йӗрӗсем пулнӑ. Йытӑ сумкӑна тӑлланӑ, анчах катлета кӑларайман.
Куславкка округӗнчи спортсменсем Алеквтина Судеркина тата Лев Петров ҫемье ҫавӑрнӑ. Вӗсем пӗрлешмешкӗн илемлӗ кун суйланӑ: 25.12.2025.
Алевтина Судеркина — ҫӑмӑл атлетика енӗпе СССР спорт мастерӗ, Раҫҫейри тата Беларуҫри чылай ӑмӑртура мала тухнӑ. Лев Петров — пауэрлифтинг енӗпе спорт мастерӗ, триатлон енӗпе иртнӗ ӑмӑртусенче нумай хутчен чемпион пулнӑ.
Куславкка округӗнче пушарта 78 ҫулти арҫын ҫунса вилнӗ. Инкек ӗнер, раштавӑн 11-мӗшӗнче, Пилешкасси ялӗнче пулнӑ.
Ҫулӑм ҫурт ҫинчен куҫса хуралтӑ таврашӗсем ҫине те лекнӗ. Пушара 10 ҫӑлавҫӑ тата 4 техника сӳнтернӗ. Ҫулӑм 73 тӑваткал метр лаптӑк ҫинче алхаснӑ.
Пушара сӳнтерсен 78 ҫулти арҫын виллине тупнӑ.
Тӑванне ҫӗҫӗпе 101 хутчен чикнӗ 20 ҫулти каччӑ тӗлӗшпе пуҫарнӑ пуҫиле ӗҫе Чӑваш Республикин Аслӑ сучӗ пӑхса тухӗ.
Следстви палӑртнӑ тӑрӑх, кӑҫалхи ҫу уйӑхӗнче вӑл Куславкка округӗнчи Минкӗш ялӗнче хӗрӗнкӗ пулнӑ. Вӑл тӑванӗпе хирӗҫсе кайнӑ, ӑна ҫӗҫӗпе чикнӗ, кӗлеткин тӗрлӗ пайӗнчен ҫӗҫӗпе 101 хутчен лектернӗ. Лешӗ вырӑнтах вилнӗ.
Следстви вӑхӑтӗнче каччӑ хӑйӗн айӑпне йышӑннӑ. Анчах вӑл тӑванӗпе мӗншӗн хирӗҫнине астумасть-мӗн.
Шупашкарти Ф. Павлов ячӗллӗ музыка училищин «Янтал» ансамблӗ «САЛТАК ҪУЛӖ» проекта хутшӑнса республика Элтеперӗн Олег Николаевӑн укҫине тивӗҫнӗ. Салтака ӑсатнин йӑли-йӗркине кӑтартса паллаштаракан спектакле ҫав укҫапа лартнӑ.
Ҫӗнӗ ӗҫе Куславккари культура ҫуртӗнче чӳк уйӑхӗн 13-мӗшӗнче кӑтартнӑ. Музыкӑпа фольклор спектакльне куракансем ӑшшӑн йышӑннӑ.
«Янтал» ансамбль ертӳҫи – Чӑваш Енӗн культурӑн тава тивӗҫлӗ ӗҫченӗ Людмила Петухова.
Чӑваш кӗнеке издательстви виҫӗ ҫул ӗнтӗ чӑвашла роман ҫыракансен конкурсне ирттерет. Унта суйласа илнӗ чи лайӑх ӗҫе кайран кун ҫути кӑтартаҫҫӗ.
Пӗлтӗрхи конкурсра Ангелина Павловскаян «Ҫутӑ ӗмӗт ҫунатлӑ» алҫырӑвӗ мала тухнӑ. Халӗ ӑна Чӑваш кӗнеке издательстви кун ҫути кӑтартнӑ.
Ангелина Павловская 1939 ҫулхи кӑрлач уйӑхӗн 31-мӗшӗнче Вӑрмар районӗнчи Пӗчӗк Енкасси ялӗнче ҫуралнӑ. Ҫӗрпӳри библиотекарьсем хатӗрлекен техникумра, И. Я. Яковлев ячӗллӗ Чӑваш патшалӑх педагогика институчӗн филологи факультетӗнче вӗреннӗ. Куславкка районӗнчи Карачри вӑтам шкулта вырӑс чӗлхи учителӗ, Куславккара комсомол райкомӗнче 1-мӗш секретарьте, унтан Шупашкарти Мускав районӗнчи ҫутӗҫ пайӗн инспекторӗнче ӗҫленӗ, Шупашкарти 45-мӗш шкулта, 1-мӗш гимназире ачасене вырӑс чӗлхипе литературине вӗрентнӗ.
Малтанхи тӗрленчӗкӗсем «Пионер сасси» хаҫатра, «Хатӗр пул» журналта пичетленнӗ, «Ярӑм-ярӑм явӑнать тӗтре» повеҫӗ 1983 ҫулта «Ялав» журналта кун ҫути курнӑ.
Юпа уйӑхӗн 25-мӗшӗнче каҫхине Вӑрнар округӗнче Тӑвальушкӑнь Ялтӑра ялӗ ҫывӑхӗнче Урваш юханшывӗнчен вырӑнти ҫынсем 33-ри арҫын виллине туртса кӑларнӑ. Ҫӑлав служби пӗлтернӗ тӑрӑх, вӑл плотинӑра пулӑ тытнӑ чухне хӑрушсӑрлӑх йӗркине пӑхӑнманнипе путса вилнӗ.
Аса илтерер: юпан 5-мӗшӗнче Сӗнтӗрвӑрри округӗнчи Шуршӑл ялӗ ҫывӑхӗнче 47-ри пулӑҫ путса вилнӗ. Юпан 18-мӗшӗнче Куславкка округӗнчи Ҫӳлти Улмалуй ялӗ ҫывӑхӗнчи пӗвере 57-ри арҫын путнӑ.
Пирӗн ентеш, 61 ҫулти Елизавета Ларионова, Пӗрремӗш каналпа пыракан «Модный приговор» кӑларӑма хутшӑннӑ.
Вӑл – Куславкка округӗнчи Анат Шуршу ялӗнчен. Елизавета 30 ҫул ытла ӗнтӗ ача пахинче воспитательте ӗҫлет. 9 ҫул каялла вӑл Подольска куҫса кайнӑ, унта ӗҫ тата савни тупнӑ.
Малтанах Елизавета секонд-хендра пӗр-икӗ япала туяннӑ. Кайран вара тӑтӑшах лосина, балахон, ҫат тытакан кофта тӑхӑнса ҫӳреме пуҫланӑ. Савнийӗ вара ҫын умӗнче унран вӑтанма тытӑннӑ. Ҫапла хӗрарӑм «Модный приговор» кӑларӑмран пулӑшу ыйтнӑ.
«Королева пулас килет!» - тенӗ вӑл. Стилистсем унӑн ӗмӗтне пурнӑҫланӑ: хӗрарӑм илемне кӑтартакан, ӳсӗмӗпе килӗшсе тӑракан тумтир суйланӑ. Капла вӑл савнине, тӑванӗсене те килӗшет.
Юпа уйӑхӗн 18-мӗшӗнче «Ташӑ эрешӗсем» хореографи пултарулӑхӗн регионсем хушшинчи IV фествиаль-конкурсӗн финалӗ иртнӗ. Вӑл Чӑваш Енри паллӑ балетмейстерсен Людмила Нянина тата Владимир Милютин ячӗпе хисепленсе тӑрать.
Конкурса ҫулсерен Чӑваш Енӗн Культура тата ӳнер институчӗ тата Куславкка ентешлӗхӗ йӗркелесе ирттерет. Унта Атӑлҫи тӑрӑхӗнчи регионсенчи коллективсем хутшӑннӑ, ҫав шутра Тутарстанри, Мари Элти тата Чулхула облаҫӗнчи.
+10.3 °C